政壇：葉劉投訴有線主持侮辱

前晚有線電視搞咗個香港島選舉論壇，新民黨主席葉劉淑儀好不滿被主持人身攻擊，有欠客觀公允，仲嬲到寫信去選舉管理委員會同有線電視投訴，希望兩方面都譴責呢位主持嘅言論。

究竟論壇主持講咗乜嘢辣慶葉劉？原來主持問佢有關黨友黃楚峰嘅事時，突然彈咗一句：「一係佢（黃楚峰）戇居，一係你戇居。」葉劉認為呢句說話會影響選民對佢嘅印象；而主持到總結時繼續爆肚，講咗一句「好耐冇做掃把頭嗰啲，就做番掃把頭」，葉劉覺得呢句簡直係侮辱緊佢本人，完全接受唔到，所以至咁嬲到寫信投訴。

論壇主持講嘅言論係咪過咗火位、係咪超越咗主持嘅角色，相信公眾自有判斷。不過，葉劉為官多年，有乜風浪未見過吖，今次為咗呢啲口舌之爭而投訴，似乎佢真係動咗真火喎！

香港島候選名單仲有單仲偕、勞永樂、劉健儀、劉嘉鴻、曾鈺成、鍾樹根、陳家洛、王國興、何秀蘭、吳文遠、許清安、吳榮春同何家泰。