政壇：鍾志平攞第四個博士銜

工業總會主席兼「電鑽大王」鍾志平（Roy）最近成功完成澳門城市大學博士學位，成為佢第四個博士銜頭，其中兩個係榮譽博士，兩個係挑燈苦讀而嚟，真係唔講得笑。一班工業家老友都戥佢開心，早前「家電大王」德國寶主席陳國民做東，齊齊為阿Roy終身學習精神飲杯。

阿Roy已屆耳順之年，問佢點解仲咁投入做學生哥？佢睩大對眼、理直氣壯咁話：「因為細個讀得書少囉！」原來佢係澳門人，十六歲就嚟香港搵食，雖然憑實力同努力成為全球最大嘅電鑽廠商，但係細個時未能完成學業始終令佢抱憾，於是就搏晒命讀書，讀到上晒癮。

美億珠寶創辦人雷雅婷同囡囡Diana王淑筠都有現身，Diana開心報喜話旗下朱古力Venchi快將開第二間分店。而「提升快樂指數基金」主席吳宏斌就話，諗緊夥拍生產力促進局合作推出「開心企業」標籤，只要僱主獲一定數量嘅員工推薦，即有機會獲得類似「商界展關懷」嘅標示，包保公司少啲戾氣、多啲生產力喎！