政壇：林鄭搬竇慳家

農曆七月相傳鬼門關大開，好多中國人都盡量唔揀喺呢啲日子搬屋，但出名「好打得」嘅政務司司長（CS）林鄭月娥就未驚過，喺啱啱過咗嘅周末，低調搬入山頂白加道政務司司長官邸，而佢仲貫徹特首CY梁振英政府慳得就慳嘅作風。

CY早前表明將會搬入禮賓府居住，但由於戀棧權位嘅貪曾住到最後一日先至捨得走，加上禮賓府有漏水問題，又係受到法律保護嘅歷史建築，裝修工程必須小心進行，估計要到今年年尾CY至可正式入住。至於今次禮賓府嘅裝修費約為九百幾萬元，一般市民睇落好似好多，但其實已比當年老董同貪曾上台時嘅過千萬使費少。

貪曾唐唐要求多多

至於佢嘅副手林鄭就仲慳家，白加道官邸嘅裝修費只需約一百二十萬元，比貪曾同唐唐做司長遷入時花費嘅約四百萬元同三百二十幾萬元，慳足六至七成。原因好簡單，眾所周知林鄭老公長居英國，兩個仔亦只會喺放長假時偶爾返港，一個人住毋須大事裝修；加上前任司長林瑞麟並冇搬入官邸居住，之前冇人住開，搞裝修亦自然簡單得多。

再者，貪曾同唐唐前者愛養魚，後者就愛藏酒，單係興建魚池同酒窖都要使唔少錢，林鄭除咗出名鍾意工作之外，冇聽過佢有乜需要特別裝修間屋嘅嗜好。據聞佢今次裝修，基本上只係按建築署嘅建議，定期修葺吓官邸嘅外牆同排水設施，冇任何因個人喜好而要大花公帑嘅項目，裝修費因而較低。

林鄭講過喺香港冇任何物業，之前一直租住位於陽明山莊嘅一個千幾呎單位，個人物品相信唔多，聽聞佢已經喺剛過去嘅禮拜六禮拜日靜悄悄搬入新居。

翻查資料，林鄭喺嗰兩日仲有好多公開活動同內部會議，唔明佢點解仲有時間搬屋囉！