空有人才無政策 高科產業必糟蹋

食物同人心一樣，腐化變壞受外在同內在因素影響。嗱，食物潮潮濕濕會腐爛，做人陰陰濕濕會變壞，一般人對呢兩樣都會敬而遠之，避之則吉。

又講腐化，又講陰濕，唔通太一叮今日要叮爆「第一貪官」曾蔭權？呢位過氣特首的確腐敗不堪o架，肩負肅貪使命嘅廉政專員公署居然無發揮官場防腐劑功能，任由貪曾逍遙法外，要叮都叮爆廉署先啦！其實，太一叮想介紹一款測試食物有冇腐爛變壞嘅新發明至啱。

呢項發明個名叫食物新鮮度檢測儀，聽落係咪好新鮮呢？嗱，真係好有創意o架，只需十五至三十秒，即可透過食品氣味分析出食品腐爛時釋放出來嘅生物胺濃度，從而分辨食品係咪符合世衞標準。無論海鮮、肉類定係蔬果，有冇腐爛，係咪變壞，同貪曾嘅貪腐醜行一樣，一一無所遁形！

如果大家好期待見識呢項發明，係可以理解嘅。所謂民以食為天，偏偏港府成條監管食品安全鏈由上而下腐朽不堪，搞到港人成日食不安心。有咗呢個檢測儀，小市民被官老爺害到上吐下瀉嘅飲食危機或者可以低番少少。

嗱嗱嗱，最令人振奮嘅係，大家知唔知呢款隨時改寫人類飲食文化嘅創意發明係邊度出品？答案係：香港城市大學！所以話啫，香港人真係得o架，創新科研呢家嘢絕對唔係外國專利。城大商學院三名畢業生見到商機，成立公司銷售檢測儀，目前已經有一間大型連鎖壽司店有意引入。

講到呢度，實在令人感慨，香港科研人才輩出，科研成果創意十足，點解港府講話發展創新科技產業講咗咁多年，到家陣都係空中樓閣，無影無蹤？鬼咩，港府發展科研真係一味得個講字，講就三頭六臂，做就「三無兩少」：無政策、無規劃、無眼光，以及投入少、支援少。咁樣搞科技港、數碼港，搞大隻講就得！

以食物檢測儀為例吖，換轉喺外國早就成為商人爭崩頭開發嘅產品，但係喺香港嘅畸形經濟之下，樓股產業一枝獨秀，科研產業閒置生銹，有眼光又肯投資嘅人根本就唔多。所以咯喎，科研產業拉牛上樹，唔係因為香港無人才、無產品，只係港府無政策、無承擔！

空有人才無政策，高科產業必糟蹋。港產官僚如果腦袋未過期，快啲攞出新思維發展高科產業。你哋都唔想好似腐爛食物同腐敗貪曾咁，被人掟落垃圾桶o架，叮！