政壇：政商定格：馬雲批家電割喉戰得把口

早前國美、蘇寧同京東呢三間內地電器商，引發咗一場大規模嘅電器減價割喉戰，雖然事件已暫告落幕，但各方嘅討論仍然繼續，阿里巴巴董事局主席馬雲亦啱啱發表咗一篇文章，內容係對呢趟家電商割喉戰嘅反思。

佢喺文章內講到，商場上兵不厭詐，如果對方係競爭對手，「詐」一下亦無礙；不過如果好似今次咁，三家公司口頭上話減價，但又冇實際行動，咁樣連消費者都「詐」埋就唔要得喇。佢仲話今次事件拖埋一班消費者落水，惡性嘅割喉戰只會令佢哋自己吃虧。

文章矛頭似乎指向引起割價戰嘅「罪魁禍首」——京東CEO劉強東。馬雲「稱讚」劉強東非常豪氣，竟於一夜間決定發動大規模割喉戰，而且仲透過微博宣布消息。但佢就質疑劉強東嘅言論背後到底有冇調動公司資源配合，如果冇嘅話，好容易令員工懷疑上頭指令真實性，會造成「狼來了」效應咁話。