政壇：政商定格：彭徐美雲絲路迎沙受訪
香港女童軍總監彭徐美雲早前率領四百名女童軍坐火車遠征絲路，彭太形容帶隊心情緊張過嫁女。最令佢意想不到嘅，係去到敦煌「鳴沙山」被當地電視台追訪，要求佢喺塵土飛揚嘅沙漠揭開口罩做訪問。此行除咗老公曉明做義工擔任領隊外，囝囝彭穎生亦上京支持啟動禮，一家大細全情投入女童軍活動。
彭太仲安排女童軍參加蘭州一間實驗中學嘅開放日，一齊唱歌跳舞，之後同甘肅張掖市一班少數民族學生喺草原上互動交流，齊齊學吓織繩結，全程笑聲不絕。可惜去到張掖市時，彭太同老公彭曉明喺酒店食早餐時，因為地板太滑，偶一不慎跣倒，當堂嚇親老公。不過，彭太堅持繼續行程，笑言好彩平時有跳舞底子，筋骨柔軟，所以冇乜大礙喎！
遇上兩位張掖市裕固族少數民族學生，彭太興奮上前打招呼。（受訪者提供）