政壇：搞搞政：超級議席大混亂選舉呈請陸續嚟

今屆立法會選舉新增五席俗稱「超級區議會」嘅區議會（第二）功能界別議席，雖然政府用「1+1=2」嚟宣傳選民一人有兩票，但有市民完全唔知「一人兩票」點投票，問題仲陸續有嚟。

根據《立法會條例》第四十三條，每位立法會選舉候選人可向當區居民投寄一封免費宣傳郵件。但呢條規定有唔少灰色地帶，由於有唔少政黨同時派人競逐超級議席同地方直選，於是喺宣傳郵件上印晒所有相關候選人嘅資訊，變相喺超級議席郵件宣傳一次，地方直選嘅郵件又宣傳多次，變相比只參加地方直選嘅候選人多一次免費宣傳機會，於是惹來個別政黨同候選人爭議。

人民力量九龍西候選人周峻翹，上星期就入稟高等法院提出司法覆核，要求法院裁定《立法會條例》第四十三條無效。黃毓民仲話政黨利用條例雙倍宣傳，揚言會追究到底，選舉完結後仲會申請選舉呈請推翻選舉結果。

搞到咁混亂，可能關乎政府官員事前未有深思熟慮所致，睇嚟選管會主席馮驊除咗喺選舉後要好好檢討外，仲要處理因為選舉混亂而可能招致嘅法律訴訟問題，睇怕佢都有排煩喇！