政壇：鍾樹根半空拉票冇人理
為咗爭取曝光，立法會候選人都出盡法寶，但用得唔好分分鐘有反效果。好似建仔香港島候選人鍾樹根，尋日喺灣仔港鐵站行人天橋拉票，貪嗰度人流多，點知佢零舍特別，租咗架吊雞車（升降台）由地面升上去天橋，然後同班市民揮手。呢招的確新鮮，但唔少途人見到以為係工人維修天橋，所以冇乜人理佢，搞到佢好尷尬。
其實點解要企喺吊雞車拉票，唔索性上天橋拉票呢？呢個大疑團未解開，佢又話今次只係第一炮，遲啲仲會租艘船向維港兩岸市民拉票。其實尋日樹根架吊雞車都好大架，中午同放工時間停喺灣仔港鐵站外軒尼詩道路邊，好彩小巴同的士司機冇乜埋怨佢阻住上落客，否則就真係搵自己笨喇！
香港島候選名單仲有單仲偕、葉劉淑儀、劉健儀、劉嘉鴻、曾鈺成、陳家洛、王國興、何秀蘭、吳文遠、勞永樂、許清安、吳榮春同何家泰。
鍾樹根尋日租咗架吊雞車，升空同市民揮手。