政壇：蒙民偉千金英國13A狀元

已故信興集團創辦人「電器大王」蒙民偉嘅愛女Perlie蒙珮兒就讀英國St. Mary's Calne女校，日前佢喺英國中學會考取得十三科全Ａ。據知該校每年只有兩至三人考獲全Ａ，Perlie笑言放榜前一晚緊張到瞓唔着。有此驕人成績，佢話全靠爸爸教導有方，爸爸從來冇畀壓力佢，但叫佢做事一定要盡力而為，事關天才都要付出至有收穫。

Perlie話讀小學時有次記錯咗考試日期同科目，惟有臨場考天才，雖然最後成績唔算差，但就激到爸爸好嬲。「佢話只要盡咗力，做得唔好都唔緊要。但記錯考試日期，即係對自己不負責任，唔可以用嚟做藉口！」蒙民偉對囡囡亦都賞罰分明，Perlie考獲八級鋼琴試時，就買咗部新鋼琴畀佢，但條件就係要佢考到演奏級。

至於將來想讀邊科，佢話爸爸生前最想佢修讀法律，事關呢行出路好。不過，佢話自己興趣太廣，到依家仲心大心細，可能會讀神學，訓練吓批判性思維喎！