政壇：公文袋遇狙擊耷頭閃

唔少建制派政界人物都遇過被激進泛民主派支持者「狙擊」，即係追住嚟鬧嘅情況。風水輪流轉，今次就輪到因港珠澳大橋同外傭居權案被外界鬧爆嘅公文袋畀人狙擊。

狙擊公文袋？乜唔係泛民先會狙擊對手嘅咩？咁諗就大錯特錯喇，近年由一班建制派支持者組成嘅愛護香港力量（愛港力量），不時都會狙擊賣港泛民嘅行動，佢哋去年區議會選舉初試啼聲，已經令到唔少泛民參選人大感頭痛；臨近立法會選舉投票日，愛港力量又再大舉出動，提醒市民泛民多年來賣港嘅事迹同行為。

雖然公文袋近日極力將個黨同兩單官司劃清界線，不停解畫，但仍然係愈描愈黑，點抹都抹唔甩。佢哋今屆空降新界西，意圖奪取該區兩個議席，早兩日落到荃灣宣傳，點知就咁好彩「遇上」愛港力量成員，帶隊嘅立法會議員余若薇成為目標，不斷被人質問對外傭居港權嘅立場，仲畀人鬧係漢奸同賣港賊，但成班公文袋成員唔知點解，全程都垂頭喪氣，只得幾位男成員識得用電話反拍愛港力量。

敗走大本營

愛港力量足足跟住公文袋十幾分鐘，跟到佢哋返到大本營先撤退；愛港力量仲將近日狙擊短片放上網，短短時間已經有千幾人睇過。而公文袋尋日就走去廉政公署投訴愛港力量騷擾。

新界西其他候選名單有譚耀宗、陳恒鑌、梁志祥、麥美娟、麥業成、田北辰、梁耀忠、李永達、陳樹英、陳強、陳偉業、李卓人、曾健成、何君堯同陳一華。