金牌騷狂抽水 撐體育大隻講

倫敦奧運中國金牌運動員訪港三日，全城轟動。市民可以追星睇騷，健兒可以掃貨血拼，港府又可以抽水邀功，三贏局面，皆大歡喜。一時間，香港搖身一變成為運動之都，學民政事務局局長曾德成話齋，港府每年使喺運動員身上開支高達三億，咦，睇嚟香港揚威奧運之日不遠噃！

唉，可惜呢啲不過係市民一廂情願啫。講真，每次奧運過後，內地都會安排金牌運動員訪港，港府次次都會大事鋪張，好似十分重視咁款，仲話要借呢啲機會帶起香港運動風氣添。如果有本土運動員取得佳績，就更加變成抽水良機。

呢嗱，當年「風之后」李麗珊奪金，一句「香港運動員唔係垃圾」即刻燃起風帆熱潮，港府亦都誓神劈願話會大力支持運動員發展。仲有「乒乓孖寶」李靜同高禮澤，同樣曾掀起乒乓狂潮，當局口講支持。可惜最後都係三分鐘熱度，不了了之。

又好似○九年東亞運咁吖，香港男足勇奪金牌，一夜之間港府由對足球不聞不問變成狂熱球迷，曾蔭權仲話當日係佢成年最開心嘅日子添，唔單止要論功行賞一眾勇將，更加要推行「鳳凰計劃」，改革足總，等香港足球可以重返以前嘅光輝歲月喎。後來呢？咪又係得個講字。

咁都未算呀，原來所謂行賞，只係為港隊球員提供為期一年、每個月六千五百蚊嘅津貼，仲要唔係人人有添。口惠而實不至，可以睇得出港府根本無心推動體育，只係借機幫自己臉上貼金。

歸根究柢，都係港府一味抽水，好大喜功累事。牛下女車神李慧詩倫敦奧運摘銅而回，加上「阿寶」多年奮戰，單車已經成為本港嘅熱門體育項目之一。弊在港府呢頭對佢哋讚譽有加，將培訓運動員功勞據為己有；嗰頭對興建專業標準單車場又死拖爛拖。到依家香港都仲未有一個合乎國際標準嘅單車場，運動員如果要訓練就要北上甚至出國。水就識抽，騷就識演，嘢就唔見政府做，唔怪得香港體育發展就好似王小二過年，一年不如一年，叮！

香港並唔缺乏運動人才，弊在港府當體育產業係做政治騷，一味虛應故事，運動員缺乏支援，就算創出佳績亦難以為繼。新特首話要新增體育專員一職，立心固然係好，不過千祈唔好學前朝政府咁齋噏當秘笈吖，叮！