行行出狀元：脫下拳套扮靚靚 女拳王剛柔並重

在拳館內，Yolly及Venus是百分百的女強人，一拳一腿，功架十足。脫下拳套，離開泰拳的世界，她們便換了漂亮衣裳，泰拳教練那種剛陽氣息，立即一掃而空，「教緊拳嗰陣，係一個自己。離開拳館，又係另一個自己，不過兩個都係真實嘅自己。」

扮靚出街 同事唔認得

「平時放假出街，都會悉心打扮，着靚啲。試過有其他同事見到，都話差啲唔認得！」與大部分女性一樣，Yolly及Venus都鍾愛行街買衫，不用教拳的日子，二人外出前，都會打扮一番。不說不知，Venus在成為泰拳教練前，曾修讀美容課程，更打算進軍美容界：「自己真係好鍾意化妝扮靚，中學畢業後，咪諗住喺呢方面發展吓！」

Venus除教拳，更會上擂台打比賽，受傷機會自然大增，身上不時貼滿一塊又一塊膠布，但出奇地都是卡通人物膠布，她靦腆地說：「咁都畀你見到！」女拳王，原來半點也不嚇人，是可愛甜心至真。