政壇：吳永嘉牽頭重慶幫發圍
本港商界有上海幫、潮州幫及福建幫，近排重慶幫都發圍，現任香港廠商聯合會副會長嘅重慶市政協吳永嘉（Jimmy）都宣布，成立「香港重慶總會」，仲搵嚟「中國水泥大王」董瑞寶做會長，重慶富商張松橋更係佢哋個會嘅名譽顧問。
總會已密鑼緊鼓籌備當中，預計明年初正式成立，核心會員包括「家用磅大王」查毅超及港島各界聯合會理事長蔡毅，而Jimmy就做副會長。重慶幫聚埋有乜搞作？Jimmy話，總會將關注及發掘重慶嘅發展機遇，事關當地經濟起飛，零售同房地產生意愈做愈有，成立總會後可出師有名，考察交流都易好多。
