政壇：張建宗無辜當箭靶

立法會選舉戰雲密布，多區候選人近日都進入埋身狂砌階段，尋日不約而同有幾個新界東選區嘅選舉論壇，多名女候選人互揪，白鴿黨嘅劉慧卿同公民力量嘅龐愛蘭不約而同爭女性選票，大講育嬰間同女廁排長龍嘅問題，辯到好躁底嘅劉慧卿更秋後算帳、亂掟廁所板，點晒名話勞工及福利局局長張建宗同政府高層唔重視女性，更要張建宗「去女廁門口排吓隊」喎！

張建宗呢次可謂無端受靶，劉慧卿更有鬧錯人、亂摳人之嫌，事關負責廁所廁格規劃嘅應該係屋宇署同食環署，而張建宗之所以畀劉慧卿針對，可以追溯到○九年嘅一次立法會過招，當時劉慧卿以促進兩性平等工作嘅質詢，要張建宗回應吓政府做咗啲乜性別觀點主流化嘅工作，結果當然係有人唔滿意答案囉。

不過，尋日多位新界候選人都係焦點出擊，獨立嘅方國珊咬住建仔嘅葛珮帆，問佢支唔支持關閉垃圾堆填區，點知被人寸番，話方國珊除咗垃圾區就冇其他嘢講，暗示佢好似選區只係西貢咁。

葛珮帆被指讀野雞大學

人民力量嘅袁彌明都圍攻葛珮帆嘅博士學位係來自一間「野雞大學」，該校現已搬往巴基斯坦。葛珮帆就強調該博士學位經九年苦讀得嚟，反轟人民力量宣揚議會暴力。另一邊廂，梁安琪又向富貴黨嘅周梁淑怡出招，話自由唔係上綱上線嘅，暗篤富貴黨唔開會，周梁就薑係老嘅辣大耍花招回應話自由係大家好珍惜嘅核心價值。周梁淑怡還擊時，就搵同佢哋爭票最激烈嘅龐愛蘭，話龐係特首梁振英忠實支持者，「梁粉擦梁鞋」，質疑對方「（政府）一吹雞就會跪低」。

選舉論壇上只見一班女候選人互出花拳綉腿，佢哋落得場，預咗子彈亂射，只係張建宗瞓低都中靶就搞笑啲！