選議員重民生 搞搞震必失分

立法會選舉打得如火如荼，有啲候選人為求連任不惜知法犯法，用埋啲旁門左道嘅手法拉票，小心未搶到議席肥豬肉，先被廉署請去飲咖啡呀，叮！

其實，爭取選票唔使出那渣招數嘅。立法會議員嘅神聖職責係為民請命，候選人只要掌握民情，急市民所急，想市民所想，自然就眾望所歸，入局威威。嗱，咪話太一叮唔畀貼士大家，想知民心所向，不妨參考以下呢個民調吖。

港大就立法會選舉調查民意，了解選民最重視候選人邊方面表現，結果民意相當清晰，八成九受訪者表明重視民生政策，比○八年上升兩個百分點。其次重視嘅係經濟政策，佔七成五受訪者，然後到政治訴求，佔六成四人。至於重視候選人議會經驗、與中央政府關係同知名度嘅比率，就分別係四成五、三成八同三成三。咁即係話，唔理你係政壇新丁抑或政治明星，民生政策始終都係贏取民心嘅成敗關鍵。

民調如鏡，選民心之所繫，民生一枝獨秀，點解呢？唔使問阿桂，其中一個原因咪係反映市民極之不滿意今屆立法會嘅表現囉。正所謂物極必反，過去四年立法會吵吵鬧鬧，烏煙瘴氣，議會政客唔係掟蕉爆粗做政治騷，就係玩拉布流會阻礙民生。市民忍咗四年睇到眼冤，有得再揀自然想揀班做實事、重民生嘅候選人。

嗱嗱嗱，近九成選民重視民生政策，反映嘅亦係社會對下屆立法會嘅深切期望。你知啦，過氣特首曾蔭權禍港殃民，留低一大堆施政爛攤子，香港當前內憂外患，百廢待舉，選民自然希望新一屆立法會議員少啲做騷，多啲做事，夾手夾腳收拾舊山河，叮！

選民眼睛係雪亮嘅，立法會選舉雖然戎馬倥傯，形勢混亂，各黨各派候選人龍蛇混雜，係惟恐天下不亂嘅醜陋政客，定係為百姓謀福利嘅代議之士，大家心中有數。咁講啦，候選人邊個拂逆民意，邊個就會受民意懲罰，被選民用手中選票掃出議事堂。

一句講晒，重民生方得民心，政客背離必失分。各位候選人，好自為之啦！至於閣下若然成功當選咯喎，就更加唔好忘記選民對你嘅寄望，一定要勤勤懇懇踏踏實實為市民謀福祉，千祈唔好學今屆班議員咁，搞搞震，無幫襯呀。民意代表背離民意，立法會再次淪為「垃圾會」，你哋隨時同貪曾一樣遺臭萬年o架，叮！