政壇：政商定格：黃振宙諗八秒買百萬貨

本港首間皮草上市公司英裘今日登場，公司請咗時裝設計界達人鄧達智「處男下海」，首次做上市公司董事局成員。原來佢同主席Pat黃振宙合作咗十幾年，仲拍晒心口咁話：「我哋好熟，知道佢盤生意點做，我信晒佢o架！」

Pat話喺呢行已經三十幾年，會直接喺芬蘭、丹麥嘅農場、拍賣會買貨，喺全球一百張嘅買家牌之中，活躍同大量買貨嘅就只有十張，當中包括佢間公司。而拍賣講求反應快、英文好、講價叻（指同拍賣官商議），大概八秒要決定買一百萬嘅貨，因為佢以前長期喺外國，母語基本上係英文，而且同啲農夫好熟，所以有番咁上下優勢囉！

當年點解會入行？原來Pat本科讀化工，但就嫌悶，喺機緣巧合之下，佢走咗去一間皮草公司面試，點知對方同佢講：「只要你肯簽四年約，就訓練你成為全亞洲最識皮草嘅一個。」佢膽粗粗試吓，一試就三十幾年。