人質慘案兩周年 新仇舊恨何時雪

叮你個鎯鎯，仲有冇天理㗎！

菲律賓槍手屠殺香港人質慘劇已經發生咗兩年，但時間恍如停頓，兩年來查實乜都無變過，八名枉死港人至今仍然沉冤未雪，僥倖生還者至今夢魘不斷。而最令人憤慨嘅係，菲律賓政府至今依然咁無賴、咁無恥、咁無品，一直唔肯道歉、唔肯問責、唔肯賠償，咁仲有天理嘅？

人質慘劇驚心動魄，歷歷在目，依舊不變嘅仲有香港人嘅沉重哀痛，以及死難者家屬鍥而不捨追討公道嘅行動。死難者家屬呢兩日會去菲律賓駐港領事館示威，同埋同港府官員見面，要求代為發聲向菲國施壓。

即係咁，自從八二三慘案之後，「菲律賓警察」已經變成無能懦弱嘅代名詞，菲律賓三世祖總統阿基諾更加成為冷血涼薄嘅象徵，恐怕菲律賓駐港領事館都唔會有乜驚喜畀大家㗎嘞。而且，香港人呢筆血債能唔能夠償還，公義可唔可以得到彰顯，求助港府都係有少少嘥氣，成功攔路鳴冤嘅可能性仲低過菲律賓警察嘅智商水平。

唔係咩？遇難領隊謝廷駿嘅兄長曾經兩次申請法援，想向賓賓當局追討，前朝曾蔭權政府一而再耍手擰頭，拒絕伸出援手，更遑論主動幫港人出頭。

講到尾，同菲律賓呢種賴皮國家交涉，始終都係要靠中央政府出面至得。令人遺憾嘅係，中央政府口口聲聲以民為本，家陣身為中國國民嘅港人枉死外地，死難者家屬要討回公道，中南海袞袞諸公無施予任何援手。難怪有人形容，「中國崛起」只係一具銀樣鑞槍頭，外交缺鈣，國防陽痿，真係一啲都無講錯。

講起同菲律賓嘅恩怨情仇，其實偉大祖國唔比香港人少。中菲兩國嘅南海主權爭議風起雲湧，阿基諾三世對中國咄咄逼人，氣燄囂張，真係是可忍，孰不可忍？哈，點知中央政府就係咁忍得，仲將訪華嘅三世祖奉為上賓，又送錢，又好招呼，爭在未割地相送咋，你話幾咁窩囊吖！

咁講啦，菲政府可以無賴，但中央政府唔可以無腰骨，正如內地輿論話齋，菲國殺我同胞，掠我領土，新仇舊恨，係時候同佢一鋪清算。

人質慘案兩周年，新仇舊恨何時雪。中央政府應該為港人出頭，就人質慘劇向菲國施壓，為港人討回公道，為自己掙回尊嚴，咁咪係國民教育嘅好教材囉，叮！