政壇：政商定格：陳細潔敦煌騎駱駝觀日出
保良局副主席「鯊魚女」Abbie陳細潔同潮州商會青委主任Johnny陳光明，早前不約而同趁暑假遊敦煌。
首次遊敦煌，Abbie同二十多位好友同行，抵達後首個節目係去鳴沙山睇日出。凌晨出發，團友個個睡眼惺忪，但佢就好High，事關呢次係佢第一次騎駱駝。抵達山腳後，仲要行百幾級樓梯，登頂一刻剛好曙光初現，晨曦美景令人迷醉。佢笑言恨不得與男朋友在此山盟海誓，可惜真命天子至今仍未出現。
Johnny係第三次遊絲路，熟晒地頭。有日突然遇上風沙，女團友紛紛以毛巾遮擋，Johnny怕畀人笑「姿整」，企定定任吹，最後吹得一面沙，幸好佢係「光頭佬」，沙粒一掃就清，佢自嘲一番：「終於覺得，原來光頭係咁方便。」
初次騎駱駝登山睇日出，陳細潔話興奮到忘記睡魔急Call。
陳光明一口氣登上甘肅段長城，心情興奮又激動。（受訪者提供）