政壇：搞搞政：田二少搶公文袋中產票

出戰立法會新界西直選嘅新民黨副主席田北辰，過去集中向中產拉票，尋日忽然入東涌逸東邨做家訪。佢話發現原來公屋居民對佢嘅反應相當唔錯，所以嚟緊會喺公屋區主力講青年向上流動議題，希望開拓年輕選民嘅票源，希望今次可以取得三萬三千票，力爭新界西第六至第八席入立法會。

近日有傳佢已得到相關人士祝福，極有機會入立法會，但佢話即使建仔最後使出棄保策略，啲票都只會過畀自己黨員，點都唔會輪到佢攞喎！佢又話自己目標明確，依家積極同對手公文袋鬥搶中產票，嚟緊仲會反覆強調中產關注嘅議題，好似反對全民退休保障：「中產擔心香港太過民粹，唔通我退休又可以分政府錢咩？」

佢又分析，依家社會政治環境對建制派好不利，好似德育及國民教育科咁，其實唔少家長都唔清楚詳情，畀啲別有用心人士不斷洗腦，呢啲不明朗因素令建制派喺新界西搶到五席嘅機會變得好微喎。新界西候選名單仲有譚耀宗、梁志祥、陳恒鑌、郭家麒、麥美娟、麥業成、梁耀忠、李永達、陳樹英、陳強、陳偉業、李卓人、曾健成、何君堯同陳一華。