政壇：一哥黑箱訪京撐做法一貫

教育局局長吳克儉早前到北京，禮節性拜訪內地教育部官員，雖然離港唔超過二十四小時，但被批評冇向外公布。警務處處長曾偉雄尋日同樣訪京返港，佢向傳媒交代訪京細節時，一樣被人問到離港上京點解唔預早公布行程，佢於是理直氣壯解釋話，呢個係一貫做法。

曾偉雄話提出呢條問題嘅人誤會晒，警務處處長並唔係政治任命官員，以往訪京亦冇預先通知傳媒，今次做法同過往相若。

曾偉雄又補充，慣常都係有實質訪問成果先會通知傳媒，雖然如此，但佢亦樂意考慮將來訪京前聯絡本港傳媒駐當地記者，向大家交代詳情。

講番今次訪京之旅，佢拜訪過國務院港澳辦主任王光亞，介紹本港治安情況，但就冇討論過《基本法》第二十三條立法，以及保衞釣魚島嘅問題。

此外，佢亦同公安部副部長見過面，討論打擊跨境犯罪事宜，又透露遲啲會有大型聯合行動，落重藥整治跨境犯罪。