政壇：三白鴿誓逐李漢奸

自稱要「日日做漢奸」嘅民主黨創黨主席李柱銘最叻係賣黨，明明仲係白鴿黨黨員身份，但就一早講明會集中精力為立會香港島公民黨候選人陳家洛名單助選，如果得閒仲會去埋九龍西幫同屬公民黨嘅毛孟靜拉票。雖然李漢奸話已向黨申請豁免，但有三位黨員見到呢啲賣黨行為真係眼火爆，去信白鴿黨全體黨員要求踢走李漢奸，以免成為黨嘅選舉負資產。

炮轟李漢奸賣黨嘅三位黨員分別係羅國強、陳德明及楊錚，以往佢哋已經試過聯署去信黨中央，要求撤去李漢奸嘅黨員資格，可惜白鴿黨中人全部扮傻，對黨友嘅憤怒始終不聞不問。直到今年立法會選舉，李漢奸又賣黨，寧助公文袋候選人都懶理黨友參選，唔知仲以為佢已經過檔公文袋。

睇唔過眼特權會員

上述三位黨員睇唔過眼，再次聯署去信白鴿黨全體黨員，數臭李漢奸自○八年以來，喺唔同場合已經試過十三次將公文袋嘅意志凌駕白鴿黨之上，即係足足賣黨十三次。佢哋仲反問白鴿黨，話一個有黨紀嘅政黨點能夠容忍李漢奸呢啲「特權會員」？仲對白鴿黨放縱李漢奸嘅行為感到極度遺憾同沉重。可能三位黨員聽聞李漢奸同美國關係密切，所以引用美國例子。聯署信中提到美國共和黨黨員，都唔會無喇喇走去幫民主黨（美國）助選啦，因為呢個係政黨紀律底線，如果李漢奸堅持咁做，佢哋建議白鴿黨召開特別黨員大會，等會員投票決定李漢奸去留。

三位黨員聯署去信黨中央，都係唔想個黨被李漢奸一次又一次咁賣咗去，佢哋對黨仲有唔少建議，例如希望班黨員唔好動輒就叫官員下台，亦盡量唔好用「打倒」呢類鬥爭味道好濃嘅字眼，因為包容係民主嘅重要部分，如果唔識寬容，唔應該叫民主黨喎。不過，李漢奸賣黨唔係新鮮事，試問佢對呢班黨友嘅意見又點會聽得入耳吖，相信班白鴿友惟有自求多福喇。

香港島候選名單仲有單仲偕、葉劉淑儀、劉健儀、劉嘉鴻、曾鈺成、鍾樹根、王國興、何秀蘭、吳文遠、勞永樂、許清安、吳榮春、何家泰。