黃成智與本報記者對答實錄

問:「出路社會服務中心」有個愛心派包行動,你本身知唔知呢件事?

答:我聽過有啲街坊搵咗間麵包舖夜晚唔要啲麵包,收集派畀啲老人家,我一直都鼓勵食肆、麵包舖及超級市場食剩啲嘢唔好丟咗佢,而應該做一啲慈善嘅工作,但具體嘅執行,我完全唔知道點做。

問:咁你喺「出路社會服務中心」及「天平邨業主關注組」入面有無角色?

答:我喺天平邨有個辦事處係「出路社會服務中心」,「天平邨關注組」其實過去係我同佢哋,一齊跟進業主立案法團貪污、腐敗等問題,於是推翻咗舊法團,依家成立咗新法團,但「天平邨關注組」喺區入面繼續做好多民生事務。我了解番同事點解我哋都有份派麵包呢?因為我哋有個場地喺度,「天平邨關注組」覺得適合,所以就借我哋個場地一齊去做。

問:派麵包嘅場地旁邊有你哋候選團隊嘅海報,會唔會擔心畀人有瓜田李下嘅感覺?

答:我完全唔知道佢個場地嘅安排點樣,依家選舉緊,天平邨好多場地都有我哋團隊嘅選舉單張、海報喺度,我又唔覺得有咩大問題囉。我完全都無參與過呢個活動。

問:但有街坊覺得你係派麵包嗰個人喎?

答:咁佢哋誤會囉!

問:依家始終都係選舉期間,會唔會執一執場地啲海報嘅位置?

答:啲海報喺邊度,我完全掌握唔到喺邊,等我了解咗先啦,如果我覺得要修正,我會修正o架喇。如果有街坊覺得有啲質疑,我絕對會處理。

問:你喺「出路社會服務中心」有咩角色?

答:之前係我成立呢個社會服務中心嘅,但後尾因為我喺立法會入面嘅工作忙,我依家就辭咗主席嗰個位,喺選舉前我已經辭咗個主席位o架喇,但因為去過個會計師度做過一次嘢,所以我應該……我唔記得咗幾時,我係辭咗個主席位o架喇。

問:以你所知呢個行動進行咗幾耐?

答:我真係唔係好知,唔知道幾時開始、做咗幾耐,同埋係啱啱今朝啲同事話你哋去問嘢,跟住我問係啲咩嚟o架?跟住我先問番晒,知道啲詳情係點。

問:會唔會覺得派麵包跟「蛇齋餅糉」有類似?

答:絕對唔同啦!因為我依家係做緊個環保……唔係我做,係啲街坊做嘅,係一個環保工作,令到啲食物唔好浪費,同埋我又無參與過,又無畀過錢,點同「蛇齋餅糉」呢?「蛇齋餅糉」係人哋嗰啲政黨,保皇黨出錢出力,一路派一路派,仲喺度宣傳o架嘛?我完全都唔知道,所以咩「蛇齋餅糉」,呢個完全都唔同。呢個係好多長者每朝都想有麵包食,但係啲生活費又唔多,依家啲街坊搵到啲咁嘅渠道,所以我係鼓勵佢哋咁樣做嘅。咁當然選舉比較敏感,所以我都會處理番啲敏感嘅問題。

黃成智派包事件「踩界」之處

時:派包活動在7月23日,即黃成智報名參選立法會後3日開始舉行,令人質疑是有心幫黃成智拉票。

地:派包地點上水天平邨屬黃成智參選的新界東選區,在一個不知名的辦事處外派發,辦事處外貼了多張黃成智的選舉宣傳海報,輪候派包的街坊清晰可見,容易令街坊聯想是受黃成智恩惠。

人:派包活動的宣傳單張雖無黃成智的名稱或肖像,但單張列明活動是由「出路社會服務中心」主辦;黃成智自○八年起向立法會申報是「出路」的董事及負責人,並在選舉宣傳海報中列明自己是「出路」的董事局主席;位於派包活動對面的「出路」辦事處,亦貼了黃成智的海報,令人難以相信他對今次活動毫不知情。

第一手消息請下載on.cc東方互動iPhone/iPad/Android/Windows Phone Apps