通脹似落未落 恒念物力維艱

「一粥一飯，當思來之不易；半絲半縷，恒念物力維艱。」朱子嘅治家格言，簡直就係時下香港基層家庭嘅最佳寫照。

嗱，唔係太一叮吹水o架。啱啱公布嘅七月份通脹率，話就話只係升咗百分之一點六，表面上比六月份嘅百分之三點七升幅放緩咗好多，但剔除政府代交公屋租金呢啲一次性紓困措施之後，綜合消費物價指數按年升咗百分之四點二，只係比六月份嘅百分之四點五低少少咋，你話通脹究竟有冇明顯改善呢？最弊係通脹回落緩慢，而經濟就大幅放緩，搞到香港陷入滯脹困境，港人受到雙重夾擊，直情係雪上加霜。

本來呢，物價高企，基層市民可以就住嚟使，應慳則慳，只可惜，好多生活必需品係咁加價，根本慳無可慳。就以食品嚟講吖，之前有調查發現，幾乎所有食品嘅價格都顯著上升，淨係一斤唐生菜咋，已經貴過上年四成。所謂「民以食為天」，依家基層市民連食餐飯都要左度右度，真係情何以堪。

再講喇，就算大人可以慳，小朋友都冇得慳o架。呢，新學年就快開始，有團體調查發現，書簿費、校服、校巴等樣樣加價，連飯盒都貴咗五毫子一個，八成家庭開學開支多過舊年，近六成家庭支出超過三千蚊，唔止一個子女返學嘅家庭，更加難頂。

話時話，一榮俱榮，一損俱損，香港經濟愈來愈依賴內地，而且大部分物資都係來自內地，但奇怪嘅係，內地七月份通脹率只有百分之一點八，創下兩年新低，而本港物價不單止冇明顯下跌，好多生活必需品仲繼續加價添。講嚟講去，都係高地價、高樓價、高租值累事，喺「三高」之下，營商成本不斷增加，淨係領匯瘋狂加租已經趕絕好多小商戶喇，物價又有乜可能下跌吖。港府代公屋住戶繳交租金，好似功德無量咁，係就係暫時拖低通脹率，可惜呢啲一次性措施始終解決唔到問題o架，最慘係嗰啲住劏房、籠屋嘅「N無」人士，試問又有邊個代佢哋交租呢？

梁振英話齋，民生無小事。搞好經濟，改善民生，始終先至係正路，弊就弊在今時今日嘅香港，無良政客搞風搞雨，政治爭拗無日無之，政府想「穩中求變，適度有為」，簡直難過上青天，叮！