SUN微博：打橫嚟講：點樣對待保釣嗰班人好？

保釣船「啟豐二號」今日中午，凱旋榮歸，相信，到尖沙咀碼頭迎接的墟冚場面，不比中國太空人訪港的低，這實是理解的，因遠赴釣魚島的十四勇士，除一個澳門人和一個內地人外，全是本土香港人嘛！佢哋喺驚濤駭浪中，被日軍戰艦重重包圍、左右夾擊，仍英勇登陸，揮舞國旗，高唱《義勇軍進行曲》，宣示主權，真係要搵命博o架！老細！

全球近廿億華人中，十六年來，就只得呢幾位中華勇士「重踏國土」咋！就只得呢隻「爛船」埋岸咋！佢哋不怕犧牲的捍衞國家尊嚴，叫嗰啲坐喺冷氣房裏呼喝叫梁特首唔好去接船的所謂政治評論員收皮啦！有人話「啟豐二號」係非法出海的，若特首容忍愛國行為凌駕法治，呢度就會走向極權統治喎！有無咁嚴重呀？此乃單一事件啫！唉！真係唔讀歷史，當年玄奘法師（三藏）出走天竺取經，也算是違法的，十多年後歸來，唐太宗咪親自恭迎！這就是「貞觀之治」的氣度囉！

保釣船被日艦撞毀，現回航途中，大陸祖國一直派海監船前後護航呀！嗱！特首辦好應立刻Book定大球場，以國家級英雄般，請古巨基、成龍陪同十四勇士，齊唱《龍的傳人》；傍晚電視新聞前的愛國宣傳片，換上眾勇士擔旗登島的畫面，用番阿牛現場唱「遲瀨次瀨」的原聲，有助推行國民教育嘞！

除了將「啟豐」移放博物館展覽外，更要幫十四人各造一具蠟像永放山頂，供人合照，同頒發大紫荊金章，兼退還回鄉證，要佢哋日夜返大陸講保釣，咁！咪多班老友，少班敵人囉！掂呀！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

就係敢爆：保釣男點睇蒼老師？

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot