政壇：林建康歐遊歎星級美食
暑假好多學生會參加遊學團，愛沙尼亞共和國駐港名譽領事林建康同太太黃寧艷早前都自製一個遊學團，佢哋帶埋長子孝勇及次子孝政，一家四口登上超豪郵輪暢遊地中海、蒙地卡羅及西班牙等，林太喺親子之旅中教囝囝認識航海知識，仲講解歐洲文化歷史。同行嘅仲有太子珠寶鐘錶主席鄧鉅明一家三口。
佢哋喺葡萄牙里斯本展開十二日郵輪之旅。林太話，去到名勝比薩斜塔前，佢就諗起著名科學家伽利略曾喺塔上拋球，做自由落體實驗，即席講古仔，孝勇聽到入晒神，林太專心教學，林生就不忘帶隊搵食，喺羅馬幫襯Harry's Bar Roma，西班牙就去巴塞隆拿嘅Can Fabes，呢間米芝蓮三星餐廳，林太食過都讚正斗。
鄧鉅明就最開心係好多朋友都肥咗幾磅，唯獨佢戒食飯、粉麵等澱粉質，結果瘦咗五磅。
林建康夫婦（後排右二及右一）約埋鄧鉅明夫婦（後排左一及二）喺里斯本登上郵輪，林孝勇（前排中）及林孝政（前排右）全程叻仔無暈船浪。（受訪者提供）