政壇：搞搞政：謝鴻興怪醫唔怕染紅
立法會九月嘅選舉逼近，好多競爭對手都出盡法寶打擊對手，前日兩位立法會法律界功能界別候選人互鬥「揭紅」，互指對手同中聯辦有幾熟後，醫學界兩位候選人醫學會會長謝鴻興、原立法會醫學界代表梁家騮尋日都大方講同中聯辦有接觸，一啲唔怕被指「染紅」。
一講起西環，政圈就有疑神疑鬼論話邊個邊個獲得祝福，尋日謝鴻興就話，西環冇講過支持佢，佢亦唔認為西環可以影響到選舉喎。「怪醫」梁家騮更一副站喺道德高地嘅姿態話，自己已向西環表明唔希望選舉被干預，亦唔使佢哋支持喎。
咁佢哋對有人建議應該以人大釋法去解決雙非嬰兒居港權問題又點睇？謝鴻興話，唔反對釋法，支持任何可以解決問題嘅手段；但怪醫就認為釋法缺乏準則，認為修改基本法更能凝聚社會共識。
設計圖片