懲教署粉飾太平 懲教員弄虛作假

係人都知，造假係刑事罪行，分分鐘監都有得坐。如果造假嘅係懲教署職員，咁就更加罪無可恕嘞，叮！

《太陽報》同《東方日報》上年十月率先報道，廉政公署拘捕懲教署更生事務組三名人員，指佢哋涉嫌造假，未有按程序向監管釋囚提取尿液樣本，就算有釋囚承認吸毒，亦搵其他人嘅尿液樣本頂包，訛稱涉事釋囚無再吸毒喎。嗱，案件尋日開審，其中兩人承認公職人員行為失當罪，仲當堂踢爆上司弄虛作假添。

以前啲戲成日講無良獄警砌囚犯生豬肉，估唔到現實世界係另一個版本，變咗懲教人員幫釋囚掩藏吸毒，唔通真係世界變咗？其實，世界無變，變嘅只係港產官僚啫。

呢，懲教人員喺庭上爆大鑊，指自九○年加入喜靈洲更生事務組，就獲告知「上頭」非常着緊釋囚更生嘅成功率，所以署內人員早有一套不成文規矩，就係喺監管紀錄同尿液測試中做手腳，隱瞞釋囚再次吸毒同失業嘅事實。即係話，信佢一成，雙目失明，懲教署以前多次向立法會提交指超過九成釋囚就業嘅數據，根本係呃神騙鬼，「實際數字應該遠低於呢個數」。

叮你個鎯鎯，咁都得？懲教署其中一個職責係幫釋囚改過自新，家陣居然為咗粉飾太平而弄虛作假，唔止幫唔到釋囚戒毒，更加係欺瞞僱主同市民，對社會治安構成威脅，該當何罪！

正所謂，上有好者，下必甚焉。懲教署好大喜功，下面班職員咪有樣學樣囉。講起真係搞笑，懲教署要釋囚改過自新，點知自己其身不正，變咗反面教材；港產官僚死要面子，結果變咗乜面都冇。

唉，講起粉飾太平，弄虛作假，呢樣嘢本來係內地官場嘅最大特色，點知呢幾年北風南漸，本地官場一樣沾染到呢種腐敗惡習，豆腐渣施政工程無處不在。香港急速內地化，警隊變港產公安，販管隊變港產城管，家陣連懲教署都淪陷埋，睇嚟唔使幾耐，一國兩制就變一國一制嘅喇，「五十年不變」嘅承諾可以收檔咯。

講番隱瞞釋囚吸毒單嘢，太一叮提醒懲教署署長單日堅，懲教署名義上仲係一個儆惡懲奸嘅執法部門，千祈唔好變成包庇犯罪嘅造假王國，如果閣下真係染上一鋪好大喜功癮咯喎，咁就要快快搣甩佢喇，叮！