政壇:政商定格:賢慧社率90後清遠義教

香港青年聯會賢慧社上星期帶領一班90後義工,去咗清遠連山壯族瑤族自治縣義教,身為香港籌委會名譽團長嘅賢慧社副召集人周沁話,義工團入面有唔少都係英文系同教育系嘅學生,加上有專業嘅課程指導,所以義教過程相當順利,佢哋以活動教學形式教低年級同學英文,而高年班方面就會教授拼音同詞彙。班義工仲自備色彩繽紛嘅教材,務求令同學可以喺愉快嘅環境下學習。

見到班義工咁踴躍,周沁話好似見番自己嘅大學生活咁,加上同一班咁淳樸嘅小學生一齊,令佢有一種洗滌心靈嘅感覺。不過,佢最開心都係成班90後義工喺義教後有所得着,明白幸福唔係必然,令佢有種生命影響生命嘅感覺,因為賢慧社影響班義工,義工就影響班小學生,教學相長。

經過今次嘅旅程,周沁發現原來好多山區嘅設施都未做到最好,好似佢哋飲用嘅水都係硬水,好多小朋友飲後出現腎石,希望將來可以改善情況。

第一手消息請下載on.cc東方互動iPhone/iPad/Android/Windows Phone Apps

周沁(左一)和賢慧社成員同90後青年學生義工打成一片。