政壇：馮氏家族為利豐正名
利豐嘅大股東係以馮國經同馮國綸為首嘅馮氏家族，由成立當日開始，就以利豐集團（Li&Fung Group）呢個名作為控股公司名稱。但原來佢哋喺呢個月，已經將Li&Fung Group「正名」，改名做馮氏集團更為貼近控股股東嘅身份。
作出呢個改動，就要講吓歷史。話說喺1906年，利豐嘅創辦人馮柏燎同李道明喺廣州成立利豐貿易公司，Li&Fung就係兩人姓氏諧音嘅合稱，呢間亦係當時中國第一間華資嘅對外貿易出口商。
直至1943年，馮柏燎過身之後，業務就交咗畀馮氏家族第二代，之後一向都唔參與業務管理嘅拍檔李道明又宣布退休，將所擁有嘅利豐股權全部賣畀馮氏家族，不過Li&Fung嘅名就一直沿用到依家。佢哋已經將網站資料改埋，網站名都改埋做馮氏集團，利豐大股東以後就叫做馮氏集團。