政壇：葉偉明告急抓水泡

距離立法會選舉投票日仲有三個星期，工聯會已有兩人大打告急牌，其中一個就係出戰新界東嘅葉偉明，佢尋日同傳媒見面時，鬼死咁肉緊話自己選情危危乎，又話自己嘅民調數字好差，仲爭幾個百分點至夠票入局。但點先搶到票佢就諗唔到，反而有街坊就畀咗條好橋佢，就係多啲叫陳婉嫻落新界東幫手拉票。

企硬唔配票

其實出動嫻姐呢塊生招牌基本上係指定動作，但建制派最叻配票，點解葉偉明唔叫其他建制派「配票」畀佢呢？佢聽到問題後斬釘截鐵話，工聯會一定唔搞配票，仲話工聯會嘅支持者唔似軍隊，唔係落柯打做乜就做乜，似乎有言外之意，暗批其他政黨有軍隊般意志嘅選民支持喎！

估唔到港島選情要嫻姐幫手吸票，如果新界東又要佢幫忙拉票，睇嚟工聯會依家係靠嫻姐「打救」地區直選，同當初諗住靠地區直選議員谷高嫻姐人氣嘅「風車效應」，似乎啱啱好調番轉。

其實葉偉明唔使擔心咁多，工聯會喺新界東有數以萬計會員鐵票，呢啲鐵票向來甚少反映喺民調上，所以新界東一班地區人士，從來冇預計葉偉明會落敗。再加上快打告急牌，分分鐘會搶走同區嘅建制派票源，所以工聯會咁早告急，真係令其他建制派跌晒眼鏡。

同樣角逐立法會新界東議席嘅仲有張超雄、田北俊、陳志全、蔡耀昌、黃成智、范國威、劉慧卿、何民傑、湯家驊、陳克勤、葛珮帆、梁安琪、龐愛蘭、方國珊、陳國強、龐一鳴、梁國雄同邱榮光。