東方呼籲創奇迹 瑪麗換肝救七命

一個行動，就能夠拯救生命；一份感動，就可以創造奇迹。真係無錯o架，嗱，因為東方報業集團嘅一個行動，加上各位善心讀者嘅一份感動，愛心奇迹就咁接連誕生，待救生命亦從此獲得重生！

奇迹由「肝」開始。大家仲記唔記得，東方報業集團獨家報道單親好媽媽陳旭娟嘅求肝故事？無錯，報道出街之後，感動全城，一呼百應，最後阿娟獲得剛剛離世嘅中年女士捐出肝臟，由瑪麗醫院動手術換肝，譜下一闋感人肺腑嘅杏林傳奇。原來，傳奇故事仲未完o架，下半集更加振奮人心！

嗱嗱嗱，就喺阿娟換肝手術成功之後，其他病人獲得捐肝續命嘅喜訊紛沓而至，九日之內瑪麗醫院總共有七宗肝臟移植手術，創出最短時間最多換肝手術紀錄。咁講啦，器官捐贈已經成為一股感動人心且洶湧澎湃嘅風潮，寫下人性光輝嘅歷史一頁。人人有愛心，世界才美麗。

換肝手術創下紀錄，生命鬥士戰勝死神，振奮人心嘅程度，不亞於保釣勇士成功登陸釣魚島。香港大學外科學系主任盧寵茂感謝東方報業集團，報道陳旭娟嘅故事觸發更多市民關注器官捐贈。港大外科學系肝臟移植外科主任陳詩正亦認為，傳媒報道求肝消息後，病人獲屍肝移植嘅機會增加，主要因為病人背後故事觸動人心。

都話o架啦，一個行動，就能夠拯救生命；一份感動，就可以創造奇迹。傳媒為民喉舌振臂一呼，善心市民熱烈響應，就係創造愛心奇迹嘅動力來源。瑪麗九日救七命，市民慷慨捐肝，不論係因為受到阿娟嘅求肝故事感動，定係響應東方嘅呼籲，都清楚反映咗兩個事實，一個係正義傳媒影響力巨大，一個係香港人愛心爆棚！

香港人真係好有愛心o架，嗱，睇番阿娟同死神搏鬥吖，經過本報詳盡報道同積極呼籲，一日之內就有過百位讀者表示願意捐肝救人，呢份無私奉獻精神已經足以令人動容。當然啦，醫護人員不眠不休完成手術，亦係愛心嘅表現，一樣咁抵讚！

一句到尾，救人一命，勝造七級浮屠。捐贈器官等如救人一命，各位市民，唔好畀呢份熱情冷卻，大家就一齊行動，為香港創造更多奇迹啦！