政壇：政商定格：葉澍堃玩盡土耳其

前經濟發展及勞工局局長Stephen葉澍堃，喺呢個暑假送咗兩個第一次畀太太做結婚三十六周年禮物，第一次沖土耳其浴，仲首次登上熱氣球俯瞰奇山異石，快哉！唯一美中不足係冇包到私人熱氣球同老婆享受二人世界。

嚟到土耳其嘅加柏都斯亞（Cappadocia），好難抗拒熱氣球嘅魔力，除可以喺一千米嘅高空，從高角度優哉游哉咁俯瞰呢個世界文化遺產之外，熱鬧時仲可以一次過見到過百個色彩斑斕嘅熱氣球喺天空飄浮，雖然Stephen嗰日只係見到五十幾個，但已覺得美不勝收，即使要朝早五點就到場都值得。佢話以前怕危險唔敢坐熱氣球，但依家年紀大膽大咗。

唔試猶自可，一試佢就愛上咗，Stephen坐嘅係四人一籃嘅熱氣球，上到半空後悔無揀包廂同老婆二人世界。除咗熱氣球，佢最難忘第一次同太太一齊享受土耳其浴，先擦晒全身嘅死皮，再用泡沫喺全身爆破，由頭洗到落腳，最後過一次凍水，令皮膚收縮，感覺相當得意。