政壇：搞搞政：田北辰做四哥

立法會新界西有十六張候選人名單爭九個議席，淨係建制派已有七條隊，競爭點會唔激烈吖。近日傳出建制派有見選情麻麻，早前已改變目標，由最初嘅「力爭五席」，變為「保四爭五」，包括建仔兩席、工聯會麥美娟同新民黨副主席田北辰！

有消息話種種民調都顯示建制派配票成效欠佳，操盤人權衡利害後，決定放棄原本排喺當選名單第四位嘅建仔陳恒鑌，改為力捧支持度逐步上升嘅田北辰進佔呢個位置。

據講，建制派對呢個安排都好無奈，但為顧全大局，只好壯士斷臂。四席既定，即係話另一代表建仔出選嘅新界社團聯會會長梁志祥可以勝出，佢尋日出席造勢活動時強調，自己支持度仍差幾個百分點先夠，今個星期會入圍村拜票。

佢尋日搵到影視明星李思捷撐場，唔通呢個都係搶票計劃一部分？

參選新界西嘅候選名單仲有郭家麒、麥業成、梁耀忠、李永達、陳樹英、陳強、陳偉業、李卓人、曾健成、何君堯同陳一華。