政壇：白鴿「投肥佬黎」被圍攻
白鴿黨被踢爆收取肥佬黎巨額獻金，呢件事去到選舉論壇即成為大家攻擊白鴿嘅最佳材料。尋日九龍東選舉論壇上，白鴿黨胡志偉慘遭左中右黨派圍攻，人民力量黃洋達狠批白鴿黨「投共」。獨立嘅謝偉俊反應仲快，佢形容白鴿黨「投肥佬黎」，唔敢講收咗幾多錢。死穴被篤中，搞到胡志偉即刻無聲出。
建制派之間好似好平靜，但其實係暗裏較勁。工聯會黃國健尋日搞造勢大會時，已不點名指有建制派喺地區撬票，周圍製造謠言，話工聯會夠票，可以投畀其他人喎。人人係唔係都告急，黃國健當然澄清話自己唔係已經夠票，工聯會票一定唔可以轉投畀第個喇。
參選九龍東嘅仲有陳鑑林、陶君行、梁家傑、譚香文同嚴鳳至。