政壇：五星旗考起蔣麗芸
喺尋日立法會九龍西選舉論壇上，人民力量黃毓民向建仔嘅Ann蔣麗芸連發兩炮，問兩條有關國情嘅問題都考起阿Ann，佢一條唔識答呆咗企喺度，一條就答錯。
毓民喺論壇後半場發炮，話阿Ann要政府硬推國民教育，就問佢識唔識五星紅旗五粒星有乜嘢意義，佢答啱大個粒星代表共產黨，但四粒細星佢就話係代表「工農兵商」，即刻被毓民大叫「錯！」糾正佢頭兩粒星的確代表工人同農民，第三粒係小資產階級、第四粒係民族資產階級。
毓民繼續問佢五十年代共產黨提倡三面紅旗代表乜，佢繼續唔識答。其實係代表「人民公社、總路線、大躍進」，睇嚟佢都要惡補吓喎。參選九龍西嘅仲有梁美芬、黃碧雲、毛孟靜、譚國僑、黃以謙、黃逸旭同林依麗名單。