政壇：EQ求克勤過票？

建仔喺新界東派兩條隊出戰，當中嘅候選人「EQ」葛珮帆透露，選情仍然非常險峻，所以真係要同黨友陳克勤傾吓畀啲票過嚟喎。EQ咁樣開到聲，莫非選情真係危到要向克勤仔「乞票」？

根據最新嘅民調結果顯示，喺今個月十四至十八號，克勤仔嘅支持度有百分之十，而EQ就只有百分之五，雖然EQ嘅支持度唔高，但民調仍然顯示佢會攞到第九席，成為最後一個入到議會嘅新東候選人，但如果克勤仔過一至二個百分點畀佢，似乎會安全啲。不過，大家唔好以為過選票好似銀行過錢咁易，尤其選舉形勢變得好快，就算過得到，分分鐘克勤仔自保唔到，咁咪變雙失？

分票機制未暢順

而且建仔其實喺今屆選舉都已經做咗分票嘅安排，克勤仔主要攞新東嘅北區同大埔嘅票，沙田、西貢同將軍澳就係EQ嘅，可能距離投票前仲有三星期，分票機制仲未運作得好。

EQ仲話今屆立法會選舉特別難宣傳，因為淨係新界東就有十九條名單，搞到啲街坊都唔想再接單張，再加上好多人都唔明一人兩票點運作，「啲人以為支持劉江華就等於支持我」。

雖然，EQ話仲有信心可以攞到足夠選票進入議會，但仍然要谷行啲，努力爭取支持，所以惟有用網上宣傳去谷高人氣喎！

新界東嘅參選名單仲有張超雄、田北俊、葉偉明、陳志全、劉慧卿、黃成智、蔡耀昌、范國威、湯家驊、梁國雄、龐愛蘭、邱榮光、何民傑、梁安琪、方國珊、陳國強同龐一鳴名單。