漏報利益政客醜 把關寬鬆議會羞

考大家一條政治題，民主黨同公民黨有乜共通點？都係包庇淫媒嘅政治打手？都係搞風搞雨嘅厚顏政客？都啱！不過，佢哋其實仲有一個共通之處，都係違規漏報嘅狂熱分子，叮！

東方報業集團獨家踢爆，民主黨高層向立法會漏報黨產利益，風波未息，公民黨高層又前仆後繼成為漏報醜聞新主角，仲唔止漏報黨產利益添，更加被本報揭發八年來一直漏報七間公司董事身份，不久前至補鑊申報。所以話，講到違規漏報呢家嘢，無品政客認咗第二，無人敢認第一。

立法會議員漏報醜聞爆不停，事件清楚反映出兩個事實。一個係再一次顯示東方報業集團為民喉舌，全方位發揮監察權貴嘅第四權功能，邊個議員違規，邊個政客枉法，一一無所遁形。另一個咯喎，就係立法會利益申報制度形同虛設，議員漏報、隱報、瞞報嘅混帳醜聞根本禁之不絕。如果唔係正義傳媒揭發，大批違規分子又可以側側膊瞞天過海，繼續呃晒天下人！

叮你個鎯鎯，立法會負責監督政府，議會政客枉法違規，以後仲點樣監督政府呀？議會政客成日批評政府官員漏報利益，誠信有問題，自己漏報利益左瞞右瞞，以後仲點樣叫市民相信你哋呀？

各位議會政客，你哋講得啱o架，誠信對從政者的確好重要，所以咯喎，麻煩閣下攞少少誠信出嚟，清清楚楚坦坦白白交代漏報事件。唔好人贓並獲斷到正一正，仲要巧言令色，砌詞狡辯，一時話唔記得，一時話無問題，一時又賴疏忽。嗱，政客寬己嚴人，雙重標準，呢啲咪叫虛偽囉，叮！

議員漏報醜行爆極都有，政客其身不正固然抵鬧，立法會申報制度把關寬鬆亦有問題。政客漏報利益八年，一句唔記得就可以無事，如果你係以權謀私嘅不法分子，都側側膊「唔記得」啦，下話？更何況，係咪真係唔記得，邊個知呢？

前車可鑑，過氣特首曾蔭權點解最後變咗貪盡海陸空嘅香港第一貪官呀？咪就係制度過分寬鬆囉，畀佢用一本自訂嘅「無字天書」，將所謂防貪守則變成畀自己中飽私囊嘅堂皇藉口！

一句到尾，高官同埋行政會議成員嘅利益申報都已經收緊咗啦，立法會嘅申報制度亦要與時並進。如果唔係，立法會繼續烏煙瘴氣，咁就該煨咯，叮！