政壇：搞搞政：港島第三席建制派互片

立法會港島區直選會產生七個議席，據聞建制派最初盤算入局嘅四人係建仔曾鈺成、新民黨葉劉淑儀、工聯會王國興同建仔鍾樹根。根據佢哋嘅構思，鍾樹根同曾鈺成分別攞港島東同西嘅支持，宣傳上亦有咁嘅策略，但操作上先發現困難重重，先有唔少建仔樁腳抱怨，話就算曾鈺成夠贏一席之後有大量剩餘票，但都好難全數過畀知名度極低嘅鍾樹根，第二係王國興同鍾樹根嘅票源非常相似，大家都係喺東區搶票，好難分得勻。至於富貴黨劉健儀嘅支持度亦開始上升，操盤人亦唔想完全放棄佢，形成三人激鬥嘅局面。

所以近期已有人向建制派放風，話操盤人當然想保四席，但若最後建制派無法穩取得第四席，操盤人或會發功將所有票源押喺一人身上，寧願穩守三席，都唔想出現乜嘢意外，而喺投票前兩周就會有所定奪。咁即係話劉健儀、王國興同鍾樹根三個只能活一個。港島候選人仲有單仲偕、何秀蘭、陳家洛、劉嘉鴻、許清安、勞永樂、吳榮春、吳文遠同何家泰。