政壇：謝鴻興怪醫同場唱雙簧
競逐連任立法會醫學界議席嘅「怪醫」梁家騮同醫學會會長謝鴻興尋日再度出席電台選舉論壇，可能因為醫生論政唔鍾意粗聲粗氣，尋日論壇駁火位欠奉。怪醫同謝鴻興兩個一唱一和，唔講都唔知兩人原來係打生打死嘅競爭對手。雖則兩人嘅政綱同醫療立場幾乎一致，但兩人對「平反六四」取態就截然不同，梁支持平反但謝就有相反嘅意見。
論壇上，有聽眾話喺公院輪候兩年都未做到白內障手術，怪醫即刻話：「瑪麗醫院無輪候時間，去瑪麗即刻有得做。」謝鴻興就和應話：「係囉，由沙頭角去瑪麗做手術都好平常啫。」
謝鴻興今次參選擺明係挑戰梁家騮，但佢仍然拒絕批評怪醫四年功過，搞到怪醫要反問佢係咪已經數夠票。謝解釋話唔想因選舉損害人格喎，總之醫學界嘅選民都好難揀支持邊個。
謝鴻興（左）同梁家騮（右）出席選舉論壇，兩位為保形象唔肯開火。