反應遲鈍惹危機 膠粒隨時變炸彈

一子錯滿盤皆落索，由於當局反應遲鈍，進退失據，颱風韋森特襲港引發嘅膠粒事件繼續蔓延，都唔知點收科。

事發兩個幾星期，膠粒貨主中石化終於出來交代事件，應承墊支一千萬元，協助港府同環保團體嘅清理工作，必要時會追加撥款。特首梁振英亦承諾跟進事件，除咗盡快清理膠粒，仲會追究相關責任。

話就話膠粒無毒啫，但就算一百五十噸垃圾吹咗落海都有排清理喇，何況膠粒好似米粒咁細，根本冇可能完全清理。呢，雖然環保團體及市民連日來紛紛出動，可惜清理膠粒速度緩慢，到依家仲有一隻裝滿膠粒嘅貨櫃未搵番，連喺邊度墮海都無法確定，手尾認真長咯。

仲有吖，雖然貨主願意出錢協助清理，但膠粒係掛十號波期間被吹落海，責任誰屬、點樣賠償，仲係未知之數。借用巴士阿叔話齋，唔止「問題未解決」，直頭有排煩添吖。

呢個世界冇後悔藥可食。事件搞到滿城風雨，市民聞膠色變，既係天災亦係人禍。如果港府有危機意識，事發後第一時間回應及處理，完全可以將意外影響降到最低，使乜好似家陣咁踢晒腳吖。

查實，海事處喺出事第二日已接獲膠粒墮海報告，點知官僚大安旨意，只係按程序通知港口使用者，直到兩日後本港多處水域出現「七月降霜」奇景至發現大鑊，你話係咪後知後覺吖。

本來呢，亡羊補牢，未為晚也，弊在當局反應依然慢九拍，冇即時公布事件，反而冚得就冚，諗住不了了之，直到畀環保團體踢爆，志願者自發去沙灘清理膠粒，至肯出來公開交代。今時今日，咁嘅服務態度，點得o架！

講開又講，事發至今，收集到嘅膠粒累計只得七十噸，仲有一半未有着落，你話點算好？禽流感爆發，只要大開殺戒，疫情即可受控；而膠粒墮海，水流方向難測，有幾多魚吞咗膠粒，對海洋生態有幾大影響，根本無從判斷，養魚戶損失慘重，呢條數由邊個孭先？

總而言之，今次意外搞成咁，顯示新班子危機意識同應變機制都嚴重不足，如果唔吸取教訓，打醒十二分精神，隨時演變成政治風暴都似！