政壇：政商定格：許漢忠遙控應變十號波
早前颱風「韋森特」襲港掛十號風球，機場管理局行政總裁許漢忠都話呢個風好犀利，十幾年嚟都未試過咁勁。雖然嗰晚佢唔喺赤鱲角當值，但喺屋企一樣冇覺好瞓，因為要做遙控工作。講到好多旅客滯留，又有地勤人員捱打，佢話對呢啲個別事件都好無奈，但機管局咁大個機構，大家同事亦夾咗好多年，有晒默契，應變冇難度。
工作咁忙，要陪太太就可能冇咁多時間，好在許太仲有兩個後備情人，仲會請佢去旅行添！佢哋就係做緊律師嘅大仔Chester同做投資銀行嘅細仔Bosco，許太話兩個仔數學出色，大學都係主修工程系，之後先再選唔同專業。依家兩個都出嚟工作，所以每年都會請佢同許生去旅行。
許漢忠（左二）兩個囝囝每年都會請爸爸媽媽去旅行。