政壇：搞搞政：勞聯無人接火棒 潘兆平焗入立會

各大政黨嘅新生代早前為咗爭取參選立法會機會扭盡六壬，但呢個爭崩頭嘅局面冇喺勞聯出現。據聞勞聯嘅勞工界議員李鳳英鐵定退下火線後，有人仲講笑話如果冇人肯接棒，可能要喺勞聯二十幾個核心成員當中抽生死籤。最後主席「潘少」潘兆平首肯接棒，仲喺冇對手下自動當選，呢個幾乎要抽籤嘅情況先冇出現到。

英姐做咗十二年勞工界議員一直表現得恰到好處，發言更係好有內涵，身為議會新丁嘅潘少都咪話冇壓力。據聞好多勞聯嘅屬會都對佢好有期望，佢其實對此都有晒心理準備，自爆打算做全職議員，計劃入立會後至少會加入人力、公務員等事務委員會喎！

議會工作繁忙，咁啱明年四月勞聯舉行換屆選舉，潘少話希望到時大家可以分工合作。明眼人都睇得出潘少或會放棄連任主席，邊個會接班成為勞聯新舵手，大家拭目以待喇！