政壇：金勞詹退選肥亨請食飯

經濟及商務發展局前局長馬時亨退出官場幾年，但仍有同官場、政界朋友保持聯絡，其中一人就係「金牌莊家」「金勞詹」詹培忠。原本報名喺立法會金融服務界角逐連任嘅金勞詹參選完又退選，原來佢同肥亨就係咪參選賭咗一鋪，邊個輸邊個贏，都好難講得清楚。

話說喺一個飯局上，金勞詹話自己唔再選，肥亨就好冷靜咁話︰「選唔選唔到你話事。」「莊家」即時癮起開盤︰「我唔選的話，你輸兩圍。」結果詹培忠宣布參選，即係輸咗，後來又決定退選，又贏番。

金勞詹宣布退選時，肥亨同保安局前局長李少光喺外地打高球。早幾日見肥亨「過境」返嚟飲玩具大王蔡志明嫁女嗰餐，問佢幾時同金勞詹計數，佢話純粹係同老友開下玩笑，加上佢哋呢次打賭嘅內情好複雜，真係要計的話要上法院先解決得到，所以佢決定做東，但又要飛北京開會，所以未知幾時開飯。