政壇：屈宏斌愛情喻投資無永恒

風水輪流轉，依家中國傷風，全球會大感冒，○九年中國四萬億救市，幫咗環球經濟一把，家陣全球經濟危危乎，中國應否再加大投資救經濟，又成為討論焦點。

滙豐大中華區首席經濟師屈宏斌對呢個議題自有其觀點，但佢講咗大半日，都講緊中國依家有需要以投資刺激經濟，尤其投資高質素嘅基建項目。佢舉例話，單從北京暴雨成災帶來重大嘅經濟損失，已反映出基建嘅唔完善，「坦白講，北京嘅下水道已經係全國最好，但上次經濟損失亦好嚴重！」佢又話中國正經歷城市化，客觀嚟講，基建需求係存在嘅。

以為佢嘅結論係中國必須以投資救經濟，點知佢好快又轉view，話「世上無嘢係永恒嘅，愛情無永恒，中國亦唔會永遠以投資刺激經濟！」

佢平時習慣喺微博發表觀點，既然用得愛情觀嚟比喻投資，倒不如喺微博開個欄講愛情觀，點知佢竟然話自己不懂愛情！