上海夢想成真 香港繼續沉淪

「做人如果冇夢想，同條鹹魚有咩分別呀？」周星馳電影嘅對白，正正講出香港嘅悲哀，冇錯喇，連發夢嘅機會都冇，遲早變成鹹魚嘅咋。

話說由美國夢工場動畫公司及內地企業合資成立嘅「東方夢工廠」正式落戶上海，雙方除咗聯手拍片，仲會投資二百億元人民幣喺黃浦江畔興建「夢中心」大型主題公園，預計每年可吸引二千萬旅客，呢鋪香港旅遊業真係有難喇。

唔係危言聳聽o架，「夢中心」主題公園除咗有劇院同影院，仲有最煞食嘅全球最大IMAX銀幕，加埋酒店、酒吧、購物區同畫廊等一系列配套，仲有星光熠熠嘅電影首映禮，簡直係吸引力超班嘅夢幻組合。試諗吓，「夢中心」預計二○一六年落成，同早一年開業嘅上海迪士尼雙劍合璧，如虎添翼，香港攞乜嘢同人哋競爭吖？

上海唔止敢發夢，更敢追夢，坐言起行，直至夢想成真。睇番香港，咁多年來故步自封，不思進取，一味食老本，旅遊業除咗幾個古董級景點，最叻就係兩個主題公園，弊在香港迪士尼只係「迷你版」，而海洋公園除咗設施老化，發展空間亦有限，吸引力已今非昔比囉。

旅遊業係本港經濟支柱之一，點知依家連原地踏步都做唔到，直頭係年年退步，唔驚就假。話時話，本港唔止旅遊之都招牌不保，連購物天堂嘅美譽亦危危乎。呢，深圳市政府計劃喺前海建設「超級商業中心」，繼海南島後，打造另一個「免稅購物天堂」，如果真係成事，你話仲有冇咁多內地客來香港購物吖喇？

唉，曾蔭權在位七年，無所作為，搞到本港競爭力好似王小二過年咁，一年不如一年，真係害人害物。新政府上台，本來係撥亂反正嘅好時機，偏偏政治爭拗不斷，反中亂港傳媒同無良政客無事生非，興風作浪，簡直惟恐天下不亂，正如有人話齋，呢班人根本就係雞蛋入面挑骨頭。

太一叮都係嗰句，唔怕唔識貨，最怕貨比貨。如果香港繼續吵吵鬧鬧，只會繼續沉淪，遲早變成鹹魚，永難翻生嘅咋，叮！