政壇：搞搞政：鎅走白鴿選票 司馬文撐阿基

被傳公文袋為咗同白鴿黨大搞密室政治協調立法會選舉，早前軟硬兼施勸退黨員司馬文放棄參選超級區議會議席，搞到佢憤而退黨。正所謂哀莫大於心死，佢決定倒戈，尋日宣布同素未謀面嘅民協KK馮檢基合作，呼籲泛民主派選民將超級議席第二票投畀KK喎。

有人自動投誠，處於滅黨危機嘅KK當然求之不得啦，尤其喺公文袋同白鴿黨協調參選期間，KK都係被拒於門外，佢同司馬文都可算係難兄難弟。KK亦話雖然民協喺九龍區同新界西扎根多年，但至今仍然未能成功打入維港對岸嘅香港島；佢又大讚司馬文形象專業，可以彌補民協缺乏中產支持者嘅不足。

司馬文突然轉軚投「馮」嘅情節可謂離奇過偵探小說，唯一嘅解釋係佢不值公文袋同白鴿黨大搞密室政治令佢成為犧牲品，所以希望藉撐KK以鎅走泛民選票洩憤，咁就令同KK選情勢均力敵嘅白鴿黨涂謹申將首當其衝，今次白鴿黨可謂害人終害己，自食惡果。