政壇：林大輝立會自組「消夜派」
喺立法會金融界功能組別自動當選嘅「星爺」吳亮星，今次重返議會講明話要好似以前咁樣，結合幾個無黨派建制派議員重組「早餐派」，睇嚟唔係想做投票機器咁簡單。
喺工業界自動當選連任嘅林大輝尋日同傳媒聚會，講起未來立法會政黨形勢時，被問到星爺有冇搵佢加入早餐派，佢話星爺咁資深，自己冇得比，又話自己好多年都冇食過早餐，如果叫佢晨咁早起身食早餐會好辛苦，反而經常食消夜喎。
咁同乜嘢人組「消夜派」呢？佢即刻爆出金融服務界參選人張華峯個名。睇嚟大輝未來四年同乜嘢人合作，已經心裏有數。參選金融服務界嘅仲有林德明、甄文星、李君豪同鄧予立。