政壇：萬科老總樓盤偷師新地
一直想「國際化」嘅內地房地產大佬萬科，喺早排買咗永泰地產旗下南聯地產超過七成股權。萬科總裁郁亮尋日嚟咗香港，交代吓佢哋過去半年嘅成績。郁總話早喺二十年前佢已有向新地偷師，仲「潛入」過佢哋樓盤，學習吓佢哋物業管理技巧咁話。不過，相信郁總最大得着應該係點樣將一個五十平方米（約五百三十呎）嘅單位間成三間房，因為佢自己覺得要做兩房都難喎，梗係啦，喺內地九十平方米以下都可以叫小戶型！
其實做乜都要有目標，萬科發展就愈做愈大，而郁總就愈來愈fit，佢話每日都會用二十分鐘跑完五公里，佢希望可以六十歲前嚟香港跑一轉四十二公里嘅全馬添！
唔講唔知，原來萬科總裁郁亮二十年前嚟過香港睇樓盤取經。