政壇：騰雞KK做侍應畀阿婆考起

參選立法會嘅工聯會陳婉嫻同KK黃國健尋日去咗黃大仙下邨冬菇亭食肆，話要透過做實習侍應去令政府關注本土經濟發展，但呢兩個飲食界新丁竟然被食客考起。

話說有食客叫油炸鬼，嫻姐落單時就寫晒成個名，搞到要KK提佢︰「寫個鬼字得o架喇！」但最搞笑嘅係嫻姐寫得太工整，大廚反問「咩嚟o架？」咪以為KK提嫻姐就好醒，佢都畀阿婆考起，皆因KK問個阿婆食乜時，阿婆竟然話唔知，搞到KK手足無措。原來婆婆係熟客，次次都係侍應阿姐幫佢揀食物，所以最後都係要阿姐落單。雖然佢哋做到甩甩漏漏，但老闆都畀八十分，認真好人。

咁啱得咁蹺，白鴿黨胡志偉拉完票去冬菇亭食嘢，好彩嫻姐同KK已收工，否則就要幫佢落單，隨時被人整蠱。九龍東參選名單仲有陳鑑林、謝偉俊、梁家傑、譚香文、陶君行、嚴鳳至同黃洋達。超級議席名單仲有何俊仁、涂謹申、劉江華、李慧琼、馮檢基同白韻琹。