政壇：CY密函純屬鱔稿

國民教育日前又惹起一場小風波。特首辦公室日前被指以特首CY梁振英嘅名義，用「cyl＠ceo.gov.hk」呢個電郵帳號，發出一封「密函」畀多個私人機構嘅主管，並以問同答嘅形式，解釋國民教育科唔係外界所指嘅「洗腦」工具。電郵發出翌日，有社會組織就質疑CY打文宣戰，暗中向機構高層施壓，要佢哋力撐政府推行國民教育科云云，但原來大家對事件敏感咗喇。

內容早已公開

我哋前日向特首辦求證，特首辦話嗰個電郵地址係特首辦作推廣現屆政府政策之用，並唔係CY私人所擁有嘅，而且有關電郵內容已上載到教育局網頁，所以根本就唔係密函。

特首辦尋日再同我哋講，為咗釋除大家嘅疑慮，再提供一個更詳盡嘅解釋。原來CY喺特首選舉期間，為加強同各界接觸，問咗好多人介唔介意提供自己嘅私人電郵，以接收佢嘅資訊，所以咪集合成一個附有各界人士嘅通訊錄囉。而喺整個競選期間，CY總共收集咗四位數字嘅電郵地址。因此，政府諗住有關人士希望更了解CY嘅政策，便善用手頭上嘅資料庫，發出推廣政府政策嘅電郵。

特首辦仲話，如果有關人士唔想收到特首辦電郵嘅話，可以選擇拒絕接收電郵o架喎。其實特首選舉都過咗四個幾月，話晒個政府屬於全港市民，如果特首辦趁呢個機會更新現有嘅資料庫，都未嘗唔係好事吖！